სამყარო შენს ოთახში

მოგესალმები მკითხველო. ეს არის ახალი ბლოგი სამყაროზე. მისი ძირითადი მიმართულება იქნება ასტრონომია და კოსმოსი, მაგრამ ასევე შეეხება მეცნიერების სხვა სფეროებსაც. განსაკუთრებით მათ რომელიც ხაზს უსვამენ სამყაროს მასშტაბურ შეცნობას, როგორიცაა ფიზიკა, ბიოლოგია და ა.შ. მე არც თუ ისე ახალი ბლოგერი ვარ. აქამდე ვფლობდი მხოლოდ ერთ ბლოგს M(ichael’s)y images და იქაც ძირითადად კოსმოსის შესახებ ვწერდი, მაგრამ ასევე იყო სხვადასხვა თემებიც, საზოგადოებაზე, ღმერთზე, ცხოვრებაზე, ასევე იყო მცირე ნოველები და ჩანახატებიც.  თუმცა რადგან პოსტები კოსმოსზე აშკარად ჭარბობდა გადავწყვიტე, კოსმოსისთვის ცალკე ავტონომია მიმენიჭებინა. აი ისიც, ბევრი არ მიფიქრია ბლოგის სახელზე. ერთი წუთი დავყოვნდი მხოლოდ, კლავიატურაზე თითები გავაშეშე და დავფიქრდი რა უნდა ერქვას მიმზიდველ ბლოგს ასტრონომიის შესახებ, რომ წაკითხვა მოგინდეს? ბლოგი… ბლოგი, სამყარო, ინფორმაცია, ის რომელიც მოგაწვდის ინფორმაციას, აქვე შენ ოთახში, სადაც ზიხარ…  ამას ხომ ისედაც ყველა ბლოგი აკეთებს, არა თავად სამყარო უნდა გახსნას იქ სადაც ხარ. ჩვენ ხშირად გვავიწყდება რამხელაა სამყარო, რა გვამოძრავებს, რა გვანიჭებს სიცოცხლის უნარს და შემოვიფარგლებით ძალზედ მიწიერი საგნებით, საგნები რომელიც ჩვენ შევქმენით. ჩვენი გაცრეცილი ყოველდღიურობა გვკეტავს სამყაროში რომელიც შემოიფარგლება ხშირად იმ ოთახით, სახლით, შენობით. ქუჩით, ქალაქით რომელშიც ცხოვრობ. მუშაობ, შემოიფარგლება კედლებით, ნივთებით. ზედაპირული ურთიერთობებით და ზედაპირული ამბებით. მე მინდა ამ ბლოგით თქვენს ოთახში შემოიჭრან ვარსკვლავები, გალაქტიკები, კვაზარები, პლანეტები და კოსმოსური მტვერი რომლისგანაც ახალი სიცოცხლე იბადება. მინდა იგრძნოთ რომ ოთახში რომელშიც თითქოს არაფერია, ჩვეულებვირივი საგნების გარდა, მოქმედებენ უხილავი ძალები და დაძრწიან უხილავი მატერიები. რომ სანამ თქვენ ბლოგის სათაურს კითხულობთ, თქვენ სხეულში მილიარდობით ნეიტრინო გაივლის, როგორც გამჭვირვალე მინაში, რომ თქვენ ოთახში არის უთვალავი უხილავი ბნელი მატერიის ნაწილაკი, რომლისთვისაც ასევე სრულიად გამჭვირვალე ხართ. მინდა თქვენც შეგიპყროთ გაოცებამ, სად ვართ? სად არის სამყაროს კიდე და დასაწყისი?

რამდენად გამომივა ეს არ ვიცი, შეფასება თქვენზე იყოს.

მე შევეცდები.